O Grupo de Acción Local do Sector Pesqueiro Ría de Pontevedra (GALP-RP) continúa co seu calendario de encontros informativos sobre as axudas que xestiona a entidade no marco do Fondo Europeo Marítimo, de Pesca e de Acuicultura (FEMPA) 2021-2027. A vindeira cita será no concello de Marín, o vindeiro mércores 15 de outubro, ás 18:30 horas, nas instalacións do é Restaurante.
O obxectivo deste encontro é achegar ao tecido económico, social e administrativo da zona toda a información relativa á nova convocatoria de axudas. A sesión está destinada a empresas, persoas emprendedoras, entidades sen ánimo de lucro e colectivos vinculados ao mar que desexen coñecer as oportunidades de financiamento que ofrece o GALP para proxectos centrados na sostibilidade, a posta en valor dos recursos mariñeiro ou a diversificación da economía local.
A xornada arrancará coa presentación do é Restaurante como exemplo de proxecto beneficiario das axudas do GALP. A continuación, o equipo técnico do grupo explicará as bases da convocatoria, os criterios de selección, os requisitos e os prazos, e prestará asesoramento de cara á preparación de iniciativas que estean aliñadas coa Estratexia de Desenvolvemento Local Participativo (EDLP). O acto tamén contará coa participación da alcaldesa de Marín, María Ramallo.
Ao remate do encontro, as persoas asistentes poderán gozar dunha degustación de produtos do mar a cargo do chef Marcos S. Area, responsable do é Restaurante.
A asistencia é gratuíta, mais é preciso inscribirse previamente. Para calquera dúbida, as persoas interesadas poden contactar co GALP Ría de Pontevedra no teléfono 886 213 015.
